Банжиг.Нээт

Банжиг.Нээт нэгэн шинэ үйлчилгээг эхлүүллээ. Энэ үйлчилгээний зорилго нь:

• Нэг талаас гадаадын улс орнуудад ажиллаж байгаа иргэдэд монголд шинээр баригдаж байгаа орон сууцны талаарх мэдээлэл өгч өөрийн орон сууцаа сонгон захиалахад нь туслах,
• Нөгөө талаас барилга угсралтын компаниудад захиалагчдыг олж өгөх замаар 2 талд зуучлахад оршиж байна.

Хэрвээ та байр хайж байгаа бол энэ булангаас Монголд баригдаж байгаа орон сууцны барилгуудын мэдээллийг авах, өөрийн хүссэн байрныхаа тухай дэлгэрэнгүй мэдээлэл, лавлагаа авахаар онлайн захиалгын системд бүртгүүлэх боломжтой. Бид таны хүсэлтийг харгалзах компаниудад нь 7 хоног тутамд уламжлан, мэдээлэл танд хүргүүлэх болно. Мөн та Банжиг.Нээт дэх байр орон сууцтай холбоотой заруудыг энд нэгтгэснийг харах боломжтой юм.

Хэрвээ та орон сууц барьж байгаа бол манай санд тухайн барилгынхаа үндсэн мэдээллийг үнэгүй байрлуулах боломжтой. Мөн зураг, дүрс бүхий маш дэлгэрэнгүй мэдээллийг та төлбөртэй тавиулах боломжтой юм. Банжиг.Нээтийн нийт хэрэглэгчдийн 40 гаруй хувь нь гадаадаас ялангуяа Солонгос, АНУ болон Европын холбооны улсуудаас ханддаг бөгөөд тэднээс шинэ байрны мэдээлэл авах хүсэлт бидэнд байнга ирж байдаг.

Нөгөө шинэ байр худалдан авагчдийг ихээхэн хувь нь эдгээр улсуудад байгаа Монголчууд маань байдаг учраас та өөрийн барьж буй барилгаа жинхэнэ хэрэгтэй хүмүүст нь хүргэж боломжтой болох юм.

Дэлгэрэнгүй мэдээллийг 462778 утсаар, info@banjig.net и-мэйлээр болон http://barilga.banjig.net хаягаар зочилж аваарай!

Хуучин Банжиг Инээд үйлчилгээг өргөтгөн зарим жижиг салбаруудтайгаа нэгтгэн бид Банжиг Зугаа үйлчилгээг туршилтын журмаар гаргаж байгаагаа дуулгахад таатай байна.

Банжиг Зугаа нь одоогоор Тоглоом, Сонжоо, Онигоо, Зураг, Видео булангуудаас бүрдэх бөгөөд тоглоомоос бусад бүх агуулгийг хэрэглэгч оруулах боломжтой юм. Та мөн Банжиг Зугаа дахь видео, зураг зэргийг шууд блогдоо оруулах боломжтой.

Дэлгэрэнгүй мэдээллийг эндээс үзээрэй.

Энэ бичлэгт жишээ болгон Банжиг Зугаа үйлчилгээний видеог блогд оруулж харууллаа.

Өнгөрсөн амралтын өдрүүдээр буюу 2007 оны 8 сарын 25, 26-ны өдрүүдэд Банжигийнхан Цэцээ гүн рүү явган аялаад ирлээ.

Аялалд Банжиг.Нээтийн ажилтангуудаас Хүжий, Саруулбаяр, Сүүеэ нар мөн гишүүдээс CastorTroy, Fuji, Lee Priest, nomad 55, Anaraa, Name, Сайхан Санаа, sun shine болон бяцхан Ундрал нар явлаа.

Бид аялалаа Төв аймгийн төвөөс эхэлсэн. Төв аймгаас Манзушир орон, тэндээ үдийн хоолоо хийж идээд үдээс хойш нь Цэцээ гүн өөд гарлаа. Цэцээ гүнээсээ уул нь Хүрхрээгийн ам руу бууж Хүрэлтогоот орчимд буухаар тооцоолж байсан хэдий ч цагийн байдлаас болоод Төр хурахын ам руу буухаар шийдсэн. Төр хурахын аманд булагийн дэргэд үнэхээр сайхан газар олж хоноглоод маргааш нь үдээс хойш болтол тэндээ амарцгаалаа. Хоноглосон газраасаа Хонхорын хавиар шууд засмал руу орох зам ойрхон гэж тооцоолон аажуухан хөдөлсөн, гэтэл зам нэг их ойр байсангүй явсаар харанхуй болсон үед засмал зам орон Налайхын сүүлийн шугамын автобусанд тосон сууж хот орлоо.

Бид аялалын явцад байгаль орчноо бохирдуулахгүй байх гэсэн зарчмыг чанад баримталж шатааж болох хогнуудыг нь шатаан шил гэх мэт зүйлсийг буцаан үүрч хотын хогийн цэг дээр хаясан. Харамсалтай нь Манзуширын модонд байгаа хогийг ихээхэн бэлтгэлтэй очиж цэвэрлэхгүй бол арай дэндүү их хогтой болсон юм байна. Тэр хогийг цэвэрлэх хүн яагаад ч байдаггүй юм. Уул нь яг хажууд нь түүхийн дурсгалт музей, амралтын газрууд байх юм.

Аялалын багийнхан маань аялалд үнэхээр сэтгэл хангалуун байсан бөгөөд зарим нь энэ явган аялалын тухай блог дээрээ бичсэн байна.

- Аялалын дараа-өнөөдөр шинэ өдөр
- Цэцээ гүний аялал-бидний амжилт
- Banjig.Net -н явган аялалаас
- Цэцээ гүн

Ер нь явган аялал гэдэг өөрийн биеэр явж байж л сайхныг нь мэдрэх эд байдаг тул та дараагийн удаа жаахан ажлаа хойш тавиад ч хамаагүй яваад үзээрэй!

2007 оны 8 сарын 4-нд болсон Банжиг.Нээтийн бүх гишүүдийн албан ёсны анхны уулзалтын үеэр нэгэн өвөрмөц санал гарсан нь гишүүдэд зориулсан үйл ажиллагаанд зарцуулахад зориулан тусгай мөнгөн хуримтлал үүсгэх түүнд гишүүн бүр сардаа 100 төгрөг оруулж байх санал байсан юм.

Энэ санал гишүүдийн чин сэтгэлээс гарсан гэдэг утгаар нь нөгөө талаар цаашид бид гишүүддээ зориулсан төрөлжсөн сургалтуудыг заавал нэгдсэн уулзалт гэхгүйгээр өөр үед ч явуулж байх нь зүйтэй юм гэж үзэж байгаа зэрэг шалтгаанаар бид энэ саналыг дэмжих хэрэгтэй гэж шийдсэн билээ.

Гишүүдэд чиглэсэн үйл ажиллагааг санхүүжүүлэх энэхүү санг ямар байдлаар ажиллуулах талаар та бүхэн сэтгэгдэл бичиж саналаа өгөөрэй. Мөн бид ойрын үед блог хэрхэн амжилттай хөтлөх талаар төрөлжсөн сургалтыг гишүүдийнхээ дунд зохион байгуулах бодолтой байгааг дуулгахад таатай байна.

Бид нилээд зөвлөлдсөний энэ жил наадам шууд дамжуулахаар болсон. Өмнө нь бид on-demand video streaming үйлчилгээ үзүүлээд нилээд туршлагажсан байсан хэдий ч шууд нэвтрүүлэг бол дамжуулж байгаагүй билээ.

Наадмыг 2 өдөр шууд үзүүлэхдээ 1 хүнээс $29 авсан бөгөөд үүний 30% нь тухайн хүний Банжиг Дансанд нэгж болон үлдэж байгаа юм. Хэдийгээр бид АНУ-д өндөр хурдын холболттой тусгай сервер бэлдсэн, Монголоос шууд нэвтрүүлэг Streaming Server лүү илгээх интернэт урсгалаа 1Mbps хүртэл нэмсэн онолын хувьд 1 серверээр 1 доор 100 хүн ямар нэгэн асуудалгүйгээр 350Kbps-ээр үзэх ёстой. Тэгэхдээ бид асуудал гарахаас сэргийлэн маш цөөхөн тооны хүнээс төлбөр авсан болно. Энэ нь АНУ дахь сервер болон Монгол дахь интернэт урсгалын төлбөр болон бусад тоног төхөөрөмжийн зардалыг ч бараг төлж дийлэхгүй гэсэн үг.

Тэгэхдээ энэ удаа бид ямар нэгэн ашгийг урьтал болгосонгүй, цаашид дэлхий даяар тархсан Монголчууддаа интернэт ашиглан ямар байдлаар шууд нэвтрүүлэг хүргэх нь хамгийн үр дүнтэй байхыг практик дээр судлахыг зорьлоо. Дараах анхаарах зүйлс харагдлаа.

1. Программ хангамжийн хувьд RealProducer + Helix Server + RealPlayer гэсэн хэлбэр маань зарим талаар учир дутагдалтай байдал нилээд ажиглагдаж байна.

2. Серверүүдийн байрлалын тухайд ч бодож үзэх зүйл байна. Одоо байгаа серверүүдийнхээ тоог дор хаяж 2-оор нэмэгдүүлэхгүйгээр өнөө үеийн шаардлага хангасан видео шууд дамжуулах үйлчилгээ явуулахад учир дутагдалтай гэсэн дүгнэлтэнд мөн хүрлээ. Ойрын үед бид Солонгос, Герман улсуудад тус бүр 1 медиа хост хийх сервер нэмэх болно.

3. Монголоос шууд дамжуулах үед интернэтийн урсгал үнэхээр хүнд байна. Хэдийгээр бид 1Mbps хурдтайгаа шилэн кабель ашигласан боловч санасан хэмжээнд энэ маань хүрсэнгүй. Зарим үед интернэт тасраад яасан тухай асуухад ISP дээр тог тасарсан гэж ичихгүй хариулж байгаа ийм нөхцөлд байдал хүндхэн гэсэн үг. Тэгэхдээ цаашид энэ байдал сайжрана гэдэгт үнэхээр итгэж байна.

Бид жил гарны өмнө анх эхлүүлснээс хойш энэ үйлчилгээнд бараг шинэчлэл хийгээгүй байж байгаад өнөөдөр Миний онигоонууд гэсэн хэсгийг нэмлээ. Энэ хэсгээс та өөрийн онигоонуудыгшүүн харах боломжтой. Мөн онигоонуудын үнэлгээг харах боломжтой юм. TomDarga гишүүн бидэнтэй уулзаж онигоог сайжруулах талаар санал тавьсаны дагуу бид энэ боломжийг нэмсэн билээ.

Ойрын үед бид Банжиг Инээд булангаа улам сайжруулах зорилготой байна. Тэгэхдээ ямар хэлбэрээр гэдгийг байнга энэ салбараар зочилдог гишүүд та бүхнээс асуухыг хүсэж байна. Та бүхэн энд сэтгэгдэл байдлаар өөрийнхөө саналыг бичиж үлдээнэ гэдэгт итгэж байна. 

Яагаад Банжиг Мэйл гэж одоо хүртэл байдаггүй юм бэ?

Манай гишүүдийн нилээд хэсэг нь @banjig.net гэсэн и-мэйл хаягтай болохыг хүсдэг, зарим нь ч бүртгүүлэнгүүтээ ийм хаягтай болчихлоо гэж эндүүрдэг. Үнэндээ бид и-мэйл үйлчилгээ явуулах талаар дотооддоо олон удаа зөвлөлдөж байсан ч гэсэн одоохондоо хэрэггүй гэсэн шийдэлд хүрдэг байлаа.

И-мэйл гэдэг бол маш чухал зүйл, ямар нэгэн байдлаар и-мэйлийн сервер түр ажиллахгүй болсноос болоод хэн нэгний 1 ширхэг ч гэсэн и-мэйл эзэндээ хүрэхгүй болно гэдэг үнэхээр том асуудал юм. Бидний хувьд өнөөг хүртэл тийм том асуудлыг бүрэн хариуцан и-мэйл үйлчилгээ үзүүлнэ гэдэг хэцүү асуудал гэж хүлээн зөвшөөрсөөр ирсэн.

Хэдийгээр одоо Монголд үнэгүй и-мэйл үйлчилгээ үзүүлдэг сайтууд нилээн хэд байдаг ч тэд үнэхээр найдвартай ажиллаж байгаа гэдэгт би хувьдаа итгэлгүй байна. Зарим нь бүр хэрэглэгчийн мэдээллийн нууцлал талдаа ч тун тааруухан.

Нөгөө талаар Yahoo Mail, Hotmail, Gmail гэх мэт үнэгүй найдвартай том системүүд байхад бид өөрсдийнхөө хир хэмжээнээс давсан (Банжиг.Нээт 160.000 гаруй гишүүдтэй /өнгөрсөн жилийн мөн үеийнхээс бараг 2 дахин нэмэгдсэн/ гэхэд хамгийн багадаа 1 хэрэглэгчид 10MB мэйлийн зай өгөхөд дискийн багтаамж нь GB-аар биш TB-аар тоологдоно, бид дэлхий даяар тархсан хэрэглэгчдийнхээ онцлогийг тохируулж зөвхөн Монгол, АНУ-д байгаа серверүүд дээрээ и-мэйл үйлчилгээ найдвартай явуулахад дэндүү жулдана) нөгөө талаар зөвхөн Монгол хэрэглэгчдэд зориулагдсан өвөрмөц онцлогтой шийдэл гаргахад хэцүү (и-мэйлийн хэрэглээ маш ерөнхий, аль улсынх гэдгээсээ үл хамааран зарчим ижил байдаг) учраас заавал и-мэйл үйлчилгээ явуулах шаардлагатай юу гэж бас үзсээр ирсэн.


Ер нь хэзээ нэгэн цагт Банжиг Мэйл гэдэг зүйл бий болох уу?

Интернэтийн орчны технологи болон хэрэглээний парадигм сүүлийн хэдэн жилд маш ихээр өөрчлөгдөж байна. Ингэснээр интернэт өөрийн гэсэн давуу талаараа бусад уламжлалт мэдээллийн хэрэгсэлүүдээс эрс ялгарч эхэлж байгаа юм. Хуучин интернэт дэх мэдээлэл маань ямар нэгэн цаасан сонин хэвлэлийг засварлан нийтлэх хэлбэрт байсан бол одоо тэднээс огт хамааралгүйгээр хэрэглэгчдийнхээ оролцоотойгоор баяжин хөгжих болсон. Жишээ нь Youtube-ээр ахлуулсан видео сайтууд, Wikipedia-аар ахлуулсан вики сайтууд, Blogger.com-оор ахлуулсан блог сайтуудыг дурдаж болно.

Зөвхөн интернэтийн хэрэглэгчийн нүдээр дээр цухас дурдсан энэ зүйлийг Web 2.0 гэж ихэнхдээ ярьж, бичдэгийг та бүхэн мэдэх байх.

Монголд ч энэ хувьсал явагдаж эхэлсэн бөгөөд Банжиг.Нээт энэ хувьслыг илүү эрчимтэй явуулахад Монголдоо голлох үүргийг гүйцэтгэхийн төлөө ажиллаж байна.

Яг үүнтэй уялдуулан бид дараах хэлбэрээр Банжиг Мэйл хэмээх зүйлийг бий болгож болох юм хэмээн ярилцаж эхлээд байгаа билээ.

Монгол хэрэглэчид + Вэб 2.0 + И-мэйл = Банжиг Мэйл

Энэ төлөвлөгөөг хэрэгжүүлэхэд бидэнд Монгол хэрэглэгчид бол хангалттай байгаа, Вэб 2.0-ийн бүрдэл хэсгүүдийг Банжиг.Нээтэд шингээж өгөх ажил одоо явагдаж байгаа. Үүний жишээ нь Банжиг Мэдлэг, Банжиг Блог үйлчилгээнүүд юм. Ойрын үед ажиллаж эхлэхээр Вэб 2.0-той холбоотой хийгдэж буй ажлууд ч чамгүй их.

Тэгэхээр Банжиг Мэйл бий болгох төлөвлөгөө маань биелэхэд тийм ч хол биш гэж бодож байна. Магадгүй 3 сарын дараа эсвэл 6 сарын дараа ч юм уу.

Юутай ч гэсэн дэлхийн хэмжээний интернэт технологи, хэрэглээг зөвхөн Монгол хэлээр, Монгол хэрэглэгчиддээ хүргэнэ гэсэн Банжиг.Нээтийн тулгуур зарчимтай энэ үйлчилгээ маань яв цав нийцнэ гэдэгт итгэж байна.

Өнөөдөр бид 160,000 гаруй хэрэглэгчидтэй болжээ. Хэдийгээр энэ дунд давхардсан бүртгэлүүд байгаа ч гэсэн энэ бол том тоо юм. Бид бүхий л үйлчилгээгээ Banjig. ID хэмээх нэгдсэн бүртгэлээр хэрэглэгчиддээ хүргэдэг. Энэ бүртгэлээрээ та чаатлахаас эхлээд өөрийн байгууллагыг удирдах, өөрийн хувийн блогийг ч удирдах боломжтой юм.

Сүүлийн үед Монгол хэл дээр олон олон шинэ сайтууд мэндэлж байна. Тэдгээрийн нилээд нь портал хэлбэрт шилжих хандлага үзүүлж байгаа юм. Мэдээж ижил чиглэлд өөр сайт гарч ирнэ гэдэг бол бидний хувьд шинэ өрсөлдөгчид гарч ирж байна гэсэн үг юм. Тэгэхдээ бид тэднийг өрсөлдөгчид гэж харахаасаа илүү бидэнд олдож байгаа том боломж гэж харж байгаа.

Учир нь тэд ямар нэг байдлаар бидний анзааралгүй үлдээсэн зүйлсийг гаргаж ирэхийг эрмэлздаг, харин бид түүнийг нь өөрийн хэрэглэгчдийн хандлагатай уялдуулан Банжиг.Нээтийг улам сайжруулах талаар бодож эхэлдэг. Энэ л зарчмаар бид Банжиг. Мэдлэг, Банжиг. Видео, Банжиг. Блог үйлчилгээнүүдийг гаргасан.

Тэгэхдээ бид юм бүхэн лүү дайрахаасаа илүү манай хэрэглэгчид юу хүсэж байна, тэдэнд юу дутагдаж байна гэдгийг эхэнд тавьж шинэ үйлчилгээнүүдээ гаргадаг. Яагаад гэвэл хэдийд ч бидний хамгийн үнэт зүйлс маань хэрэглэгчид маань байдаг учраас.

Бид Банжиг.Нээтийг хэрэглэгч дээр суурилсан байдлаар хөгжүүлэх чиглэлд улам ихээр анхаарч байгаа билээ. Үүнийн нэг илрэл нь BBlog.mn буюу Банжиг Блог үйлчилгээ юм.

Банжиг Блог нь одоогоор альфа түвшиндээ байгаа хэдий ч боломжийн хувьд Blogger.com, WordPress зэрэг дэлхийн алдартай блог системүүдийн чухал шинжүүдийг бүрэн агуулахаар хөгжүүлэгдэж байгаа билээ.

Хэдийгээр бид дор хаяж бетта түвшинд хүргээд энэ үйлчилгээгээ зарлаж болох байсан ч гэсэн, цаашид хийгдэх туршилтын хугацааг багасгах үүднээс альфа буюу ихэнхдээ манай ажилтангууд болон цөөн тооны хэрэглэгчдийн хүрээнд хийгддэг тестийг нийт гишүүдийн оролцоотойгоор хийхээр шийдлээ. Иймээс та ямар нэгэн алдаа мэдэгдвэл бидэнд аль болох мэдэгдэж байхыг хүсье.

Banjig.Net ажиллаж эхэлснээс хойш дан өөрийн хөгжүүлсэн программ хангамжуудыг ашиглан өөрсдийн бэлдсэн агуулгыг нийт Монголчууддаа интернэтээр хүргэж ирсэн билээ. Харин сүүлийн үед гар утасны хэрэглээ зөвхөн ярих, мессаж бичихээр хязгаарлагдахаа больсон энэ цаг үед бид бүх зүйлсийг зөвхөн вэбээр явуулаад байх боломжгүй гэдгийг ойлгож байгаа. Тиймээс бид одоо байгаа үйлчилгээнүүдээ гар утасны хувилбарт шилжүүлэх, гар утсаар дамжуулан төрөл бүрийн контентыг хэрэглэгчиддээ хүргэхээр судалж байна. Цаашид Ирмүүн, Ялгуун гишүүдийн үнэ цэнийг илүү нэмэгдүүлэх бодлого баримталж байгаатай холбогдуулан гар утасны контентуудад хандах боломжийг Ирмүүн, Ялгуун гишүүдэд илүү байхаар шийдэл гарах болов уу. Нөгөө талаар бид өөрийн вэбийн одооны үнэ цэнийг гар утас руу авчрах гэж байгаа учраас Banjig.Net сайтын аль ч хэсгийг үзэж байсан ялгаагүй хэрэглэгч тухайн хэсгийн хүссэн зураг, дуу, дүрсийг шууд гар утас руугаа авах боломжийг олгох болно. Хэдийгээр зах зээлд Мобиком, Скайтел компаниуд өөрийн сүлжээний давуу байдлаа ашиглан мессаж дээр суурилсан үйлчилгээний шимтгэлийг өндөр барьж байгаагаас (сар бүрийн суурь хураамж дээрээс нэмэгдээд 40-60%) гадна зарим GPRS боломжуудыг шууд ашиглах боломжийг тодорхой хэмжээгээр хязгаарлаж байгаа үед бид өөрсдийн давуу талыг ашиглах нь чухал гэж үзэж байгаа болно. Бидний давуу тал бол нийт бүртгэлтэй 80 мянга хол давсан хэрэглэгчид маань юм. Бид анхнаасаа хэрэглэгчийн нэгдсэн бүртгэл дээр суурьлан бүх зүйлээ хөгжүүлж ирсэн тул энэ давуу талаа бид гар утасны салбар дээрээ ч ашиглах болно. Өөрөөр хэлбэл бид тусгай гишүүнчлэлээрээ дамжуулан төлбөрийг цуглуулаад контент зарах боломжтой гэсэн үг. Өнөөдрийн байдлаар гишүүдийн бүртгэлийн систем нь бүрэн цогц хэмжээнд ажиллаж байгаа сайт Монголд байхгүй. Хэсэг хугацаанд Banjig.Net-ийн түвшинд хүрсэн ийм төрлийн сайт гарна гэдэг ч бас шууд хэлэхэд хэцүү. Гар утасны контентын хувьд бид Banjig. Хөгжим салбар дээрээ суурьлан бүх төрлийн гар утасны ая, бүх салбаруудаас төрөл бүрийн зургуудыг зарахаас гадна өөрсдийн хөгжүүлсэн гар утасны тоглоом тусгай программуудыг борлуулах болно. Одоогийн байдлаар "Бадарчин" тоглоомын гар утасны хувилбар бэлэн болоод байгаа. Banjig.Net он гараад томоохон шинэчлэлт их хийгээгүй тул бид үндсэн хувилбарынхаа дугаарыг нэмэгдүүлээг бараг 3 сар болж байна. Харин одоо удахгүй ажиллаж эхлэх Banjig. Mobile, Banjig. Бизнес лавлах салбарууд болон Гишүүнчлэлийн, Төлбөр тооцооны системд хийгдэх шинэчлэлүүдийг агуулсан Banjig.Net 2006, v1.5 хувилбарыг тун удахгүй зарлах болно. Миний энэхүү блог дахь Banjig.Net хэсэг нь цаашид Banjig.Net-д хийгдэх шинэ зүйлсийг зарчмын болон технологийн талаас нь урьдчилан мэдээлж байхад голдуу чиглэх бөгөөд хувилбаруудын талаарх дэлгэрэнгүй мэдээлэл нь уламжлалт ёсорр Banjig.Net дээр өөр дээр нь мэдээлэгдэж байх болно.